Institiúid na Mara agus Músaem Cathrach na Gaillimhe ag tabhairt eolaíocht agus saol rúnda Bhá na Gaillimhe chun solais

D’fhógair Institiúid na Mara, i gcomhpháirt le Músaem Cathrach na Gaillimhe, clár bríomhar d’imeachtaí poiblí saor in aisce a bheidh ar siúl ó Mhárta go Meitheamh mar chuid de  An Tír Faoi Thoinn – The Land Beneath the Waves.  Tugann an tionscnamh rannpháirtíochta poiblí nua seo cuireadh do dhaoine de gach aois iniúchadh a dhéanamh ar an saol muirí, na gnáthóga agus na tírdhreacha faoi uisce atá i bhfolach faoi dhromchla Bhá na Gaillimhe.

Tógann an tsraith for-rochtana seo ar an taispeántas a osclaíodh le déanaí i Músaem Cathrach na Gaillimhe, a nochtann bithéagsúlacht shaibhir, oidhreacht chultúrtha agus tábhacht eolaíoch thimpeallacht mhuirí na hÉireann. Trí chainteanna, ceardlanna agus eispéiris idirghníomhacha, spreagann an clár cuairteoirí chun na scéalta, an eolaíocht agus na speicis a mhúnlaíonn na huiscí ar chósta thiar na hÉireann a aimsiú.

Cuireadh tús leis an gclár níos luaithe an mhí seo le himeacht taiscéalaíochta ar an gcladach i gcomhpháirt le Galway Atlantaquaria, áit ar aithin rannpháirtithe speicis mhuirí agus ar fhoghlaim siad faoi éiceachórais éagsúla idirthaoideacha na hÉireann.

Imeachtaí atá ag Teacht

Buaicphointe mór den tsraith is ea  Stories from the Sea, tráthnóna le scannánóir faoi uisce a bhfuil gradaim bainte amach aige,  Ken O’Sullivan, a bheidh ar siúl Déardaoin, an  26 Márta  i Músaem Cathrach na Gaillimhe. Tá an t-imeacht seo lánáirithe cheana féin, rud a léiríonn an fonn mór atá ar an bpobal tuilleadh a fhoghlaim faoi shaol aigéin na hÉireann. Roinnfidh O’Sullivan scéalta agus ábhar scannánaíochta ó bhreis agus 25 bliain ag iniúchadh an Atlantaigh Thuaidh — ó theagmhálacha le dronga míolta móra marfacha go dtí scannánú ar na hainmhithe is mó ar domhan, na míolta móra gorma agus na míolta móra eiteacha. Craoladh a shraith cháiliúil  North Atlantic  go hidirnáisiúnta, agus tá a shaothar le feiceáil i mbailiúcháin cháiliúla píosaí scannánaíochta faoi uisce de chuid BBC Earth.

Leanann an clár for-rochtana le sraith ceardlann agus cainteanna atá oiriúnach do theaghlaigh:
•    Dé Sathairn, an 28 Márta –  A Sea of Colours: Dive into Seaweed Secrets
Ceardlann  phraiticiúil le Julie Grivotte, taighdeoir PhD in Ollscoil na Gaillimhe, a dhéanann iniúchadh ar bhitheolaíocht na bhfeamainne, ar éagsúlacht speiceas agus ar a tábhacht éiceolaíoch.
•    Dé Céadaoin, an 1 Aibreán –  From Superfood to Fertiliser: Are Seaweeds Ireland’s Hidden Gems?
Caint ag am lóin le Julie Grivotte a scrúdaíonn úsáidí traidisiúnta agus úsáidí atá ag teacht chun cinn i bpobail agus i dtionscail chósta na hÉireann.
•    Dé Sathairn, an 25 Aibreán –  The Living Seafloor: Marine Life and Underwater Landscapes of the West Coast. Caint le Nick Pfeiffer,  éiceolaí muirí agus grianghrafadóir faoi uisce a bhfuil gradaim bainte amach aige, a thugann léargas ar bhitheagsúlacht agus ar leochaileacht ghnáthóga ghrinneall na farraige in Éirinn.

Beidh imeachtaí eile ar siúl idir Márta agus Meitheamh, lena n-áirítear gníomhaíochtaí trá, ceardlanna cruthaitheacha, turais threoraithe scoile agus cainteanna le heolaithe ó Institiúid na Mara. Coinnigh súil ar chainéil mheán sóisialta an Mhúsaeim agus Institiúid na Mara chun tuilleadh sonraí a fháil.

Ag labhairt faoin gclár, dúirt an  Dr Rick Officer, POF Institiúid na Mara: 

“Tá Institiúid na Mara bródúil as a bheith ag comhoibriú le Músaem Cathrach na Gaillimhe chun léargas a thabhairt ar an saol faoi Bhá na Gaillimhe. Múnlaíonn ár n-aigéan féiniúlacht, geilleagar agus timpeallacht na hÉireann, agus cabhraíonn cláir cosúil le An Tír Faoi Thoinn – The Land Beneath the Waves linn an scéal sin a roinnt leis an bpobal. Trí thaighde muirí a thabhairt amach as an tsaotharlann agus isteach i spás ina féidir le daoine idirghníomhú, foghlaim agus inspioráid a fháil, tugaimid deis do phobail iniúchadh a dhéanamh ar an saol muirí atá ar leac a dorais agus tuiscint níos fearr a fháil ar an ról ríthábhachtach atá ag ár n-aigéan inár n-oidhreacht náisiúnta agus inár saol laethúil.”

Dúirt Léa Delhaise, intéirneach iarchéime de chuid Institiúid na Mara i Músaem Cathrach na Gaillimhe:
“Is iontach an rud é daoine a thabhairt i gcomhrá leis an aigéan atá ar leac a dorais. Tugann na himeachtaí seo deis do chuairteoirí na speicis, na scéalta agus an eolaíocht dochreidte atá i bhfolach faoi Bhá na Gaillimhe a aimsiú, agus a thuiscint cé chomh dlúth agus atáimid uile ceangailte leis an saol muirí. Tá sé thar a bheith sásúil teaghlaigh, mic léinn agus lucht spéise san aigéan a fheiceáil ag glacadh páirte chomh díograiseach sin.”

Beidh na himeachtaí ar fad ar siúl i  Músaem Cathrach  na Gaillimhe agus beidh siad  saor in aisce, ach beidh gá le háirithint roimh ré mar tá líon na n-áiteanna teoranta.

Molann Institiúid na Mara do theaghlaigh, do ghrúpaí pobail, do mhic léinn agus do lucht spéise san aigéan páirt a ghlacadh agus iniúchadh a dhéanamh ar an saol spéisiúil faoi Bhá na Gaillimhe.

Eolas faoi Áirithint

Chun áit a chur in áirithe ag imeachtaí atá le teacht, déan teagmháil le Músaem Cathrach na Gaillimhe

: Ríomhphost:  Museum@GalwayCity.ie 

Fón:  (091) 532460

CRÍOCH